Мэдээ

Үндэсний их баяр наадмын босгон дээр "Гавьяат багш" төрлөө

  • .

  • 2019-07-10

  • 384

Анхдагчдын өлгий Булганхангай нутгийнхаа алдар цуутнуудын буухиаг түүчээлж, энэ жил түүхт 50 жилийн ой нь тохиож байгаа Улсын тэргүүний "Эрдмийн өргөө цогцолбор" сургуулийн захирал асан Д.Лхагваням "Монгол улсын Гавьяат багш" цолоор энгэрээ мялаалаа. Үе үеийн шавь нар, хамт олон, нийт Булганчуудынхаа өмнөөс халуун талархал дэвшүүлье.

Ардын Хатанбаатар С.Магсаржавын нэрэмжит шагнал

  • .

  • 2019-07-10

  • 130

Булган аймгийн дээд шагнал "Ардын Хатанбаатар С.Магсаржавын нэрэмжит шагнал"-аар залуу нас, сэтгэл зүрхээ сурган хүмүүжүүлэх үйлсэд зориулсан ахмад багш Б.Бадрах, Булган аймгийн төрийн алба, хөдөө аж ахуйн салбарт 33 жил ажиллаж байгаа аймгийн Засаг даргын орлогч О.Гантулга нар шагнагдлаа. Нийт Булганчуудынхаа нэрийн өмнөөс баяр хүргэж, эрүүл энх, аз жаргал хүсэн ерөөе.

Чин Ван Ханддоржийн хөшөөнд цэцэг өргөлөө

  • .

  • 2019-07-09

  • 113

Тулгар төрийн 2228, Их Монгол улс байгуулагдсаны 813, Үндэсний эрх чөлөөний хувьсгалын 108, Ардын хувьсгалын 98 жилийн ой, аймгийн баяр наадам, өнөө жил мэлмий гийсний 150 жилийн ой тохиож буй Чин Ван Ханддоржийн хөшөөнд цэцэг өргөх ёслолоор эхэллээ.

Баяр наадмын нээлт

  • .

  • 2019-07-10

  • 308

Барс арслангийн хүчитнүүд нь баруун зүүнээ магнайлан гарч 
Хурдан харцагын хүлгүүд нь хурмаст тэнгэртээ тоосоо өргөж 
Эрхий мэргэн харваачид нь эвэр нумаа хөвчлөн татсан 
Эрийн гурван наадам эхэллээ. 

Булган аймгийн баяр наадмын нээлт төв цэнгэлдэх хүрээлэнд 2019.07.10-ны 11.30 цагт эхэлж, аймгийн Засаг дарга З.Батзориг нээж үг хэллээ.

Тэрбээр: 

Бахархах түүх, омогших алдар, хайрлах нутаг нэгтэй, элгэн садан Булганчууд аа

Хүндэт зочид, төлөөлөгчид өө!

Тулгар төрийн 2228 жил, Их Монгол улс байгуулагдсаны 813, Үндэсний эрх чөлөөний хувьсгалын 108, Ардын хувьсгалын 98 жил, Үндэсний их баяр наадмыг тохиолдуулан Та бүхний түмэн амгаланг айлтгаж, баярын мэнд дэвшүүлье.

Тэнгэр эцэг тэтгэн хураа хайрлаж, газар эх дэлгэрч шимээ өгсөн, хуртай зуны энэ өдөр омогших бахархал, дээдлэх уламжлал, дэлгэрэх соёлын цөм болсон үндэсний их баяр наадам маань бахархлыг бадрааж, золбоо хийморийг өргөн эхэлж байна.

Үндэсний их баяр наадмаа хөдөлмөр бүтээлийн өрнүүн амжилт, хүрэх ирээдүйн зорилго, эх орныхоо хөгжил цэцэглэлтэд оруулах хувь нэмэр, энх мэндийн ерөөл билгээр угтан тосдог уламжлалтай билээ.

Төрийн тулгуур, улсын үндэс болсон айл өрх маань 1236 үр хүүхдээр ам бүлээ нэмж, Булганчууд бид 62097-уулаа боллоо. Хүн нэмбэл хүнс нэмнэ гэж Та бидний билэгшээдгээр буянт мал сүрэг өсөж 3.3 саяд хүрлээ. Буудайгаараа алдартай Булган нутгийн тариаланчдын хөдөлмөр зүтгэлийн дүнд 56.7 мянган тонн үр тариа хураан авсан нь 1990 оноос хойш хураан авсан хамгийн арвин ургац болж, нэгжээс авсан ургацын хэмжээгээр улсдаа тэргүүлэгчидийн эгнээнд жагсаж байна.

Дэд бүтцийн салбарын суурь болсон Дулааны цахилгаан станц галаа өрдөн, илчээ түгээсэн, Булган-Орхон-Хишиг-Өндөр-Гурванбулаг чиглэлийн авто замын төгсгөлийн хэсэг 22 км авто зам хөдөлгөөнөө нээсэн, Булган хот дэлхийн жишигт нийцсэн шинэ цэвэрлэх байгууламжийн ажлаа эхлүүлсэн, бизнесийн жишигт нийцсэн Худалдааны төв ашиглалтад орсон гээд Булганчууд бидний он удаан жил хүлээсэн ажлууд үр шимээ өгч эхэлсэн түүхэн жил өрнөж байна.  

Бидний өнгөрснийг бүтээж өнөөдөрт хүргэсэн ахмад настан азай буурлууд, өнөөдрийн түүхийг бичилцэж яваа идэр залуу үе, ирээдүйн хөгжлийг цогцлоох хүүхэд багачууд гээд ажилч, хичээнгүй ард иргэд Та бүхний нөр их хөдөлмөрийн үрээр эдийн засаг, нийгмийн бүхий л салбарт тодорхой өөрчлөлт, ахиц дэвшил гарсныг тэмдэглэн хэлэхэд бахархалтай байна.

Анхдагч гавьяатан, алдар цуутнуудын өлгий Булганчууд бидний хувьд өнөө жил бахархан тэмдэглэх тэгш ойн баярууд тохиож байна. Эх сайхан нутгийн маань эзэн ноён  Эрдэнэ дайчин хошой чин ван Ханддоржийн мэндэлсний 150 жил, Улсын баатар С.Лхагвадоржийн 100 жил, Даян аварга С.Цэрэнгийн мэндэлсний 80 жил, Халх голын ялалтын 80, Атар газар эзэмшсэний 60 жилийн ойг онцлон дурдах нь зүйтэй.

Булганчууд бид түүхэн ойн баяруудаа өргөн дэлгэр, үр өгөөжтэй, үлдэх бүтээл тууривалтай  тэмдэглэн өнгөрүүлэх болно.

Хүндэт наадамчид аа!

Бидний хамтын зүтгэл, хичээнгүй хөдөлмөр, чин сэтгэлийн хүчин чармайлтын үрээр Монголын түүхийн домогт өлгий Булганхангай нутаг минь улам цэцэглэн хөгжих болтугай. Хүчтэний тэнхээ их, хүүхдийн гийнгоо цээл, хүлгийн давхил төгөлдөр, харваачдын сэц мэргэн, зон олны маань сэтгэл тэнүүн сайхан наадахын бэлгэ ерөөл өргөж, дэлхийд ганц монгол наадам дэнж дүүргэн эхэлж байгааг даяар олноо дуурсган зарлая.

 Хотол олноороо сайхан наадаарай.

 

 

Аймгийн баяр наадмын хөтөлбөр

  • .

  • 2019-07-09

  • 261

ИРГЭДИЙН ӨРГӨДӨЛ, ГОМДОЛ, САНАЛ ХҮСЭЛТИЙН ШИЙДВЭРЛЭЛТИЙН ТАЙЛАН /2019 оны хоёр дугаар улирал/

  • .

  • 2019-07-05

  • 200

Булган-Орхон чиглэлийн замын нээлтийн ажиллагаа боллоо

  • .

  • 2019-07-08

  • 232

Булган-Хишиг-Өндөр-Гурванбулаг чиглэлийн 133,7 км авто замын эхлэлийн 22 км хатуу хучилттай авто замын хөдөлгөөн нээлт өнөөдөр боллоо. Нээлтийн ажиллагаа Булган аймгийн Булган сум 100000 саятан жолоочдын хаалганд болж УИХ-ын гишүүн Ж.Бат-Эрдэнэ, ЗТХЯ-ны хэлтсийн дарга, Булган аймгийн ИТХ-ын дарга М.Оюунбат, Засаг дарга З.Батзориг холбогдох албаны хүмүүс, ард иргэд оролцлоо. Тус 133,7 км зам ашиглалтад орсноор Улаанбаатар Булган Мөрөн чиглэлийн зам урдуураа холбогдож Улаанбаатар Дархан Орхон Булган Мөрөн чиглэлийн авто замын ачаалал багасаж 100 гаруй км-ээр бага явж ард иргэдэд эдийн засгийн хувьд хэмнэлт авчрах давуу талтай. Улсын төсвийн 20,9 тэрбум төгрөгийн төсөвт өртөгтэй тус замыг Эйч Кэй Би интернэйшнл холдинг ХХК гүйцэтгэх хугацаанаас 3 сарын өмнө хүлээлгэн өгсөн.

Монгол Улсын Үндсэн хуульд оруулах нэмэлт, өөрчлөлтийн талаар иргэд сонгогчдод мэдээлэл өгч санал бодлыг сонсох уулзалт Булган аймагт зохион байгуулагдлаа.

  • .

  • 2019-06-22

  • 120

Бүсчилсэн хөгжлийн хэлэлцүүлэг Булган аймагт зохион байгуулагдлаа

  • .

  • 2019-06-22

  • 56
Үндэсний хөгжлийн газар, Булган аймгийн Засаг даргын тамгын газар, Германы хамтын ажиллагааны нийгэмлэг, ЖАЙКА төсөл хамтран “Бүсчилсэн хөгжлийн бодлогын хэлэлцүүлэг”-ийг Булган аймагт зохион байгууллаа.
21 аймагт зохион байгуулагдаж буй Бүсчилсэн хөгжлийн бодлогын хэлэлцүүлэгт Булган аймгийн шийдвэр гаргах түвшний удирдлага албан тушаалтнууд, ТББ-ын төлөөлөл, иргэд хүрэлцэн ирж санал бодлоо илэрхийлсэн. Булган аймгийн хувьд мал аж ахуй, газар тариалан, аялал жуулчлалыг эдийн засгийн тэргүүлэх салбар болгон зарлаж эдгээр салбарын хөгжилд ихээхэн анхаарал хандуулж ажлын байр нэмэгдүүлэх, жижиг дунд үйлдвэрлэлийг дэмжих, үр шимийг нь хүртэх зэрэг тодорхой ажлыг эхлүүлэхээр ажиллаж байгаа юм.

"Орон нутгийн зам-Хөдөлгөөний соёл"

  • .

  • 2019-06-20

  • 276

Орон нутгийн замд гарсан ослын улмаас амь насаа алдсан жолооч, зорчигчийн 82.5 хувь нь хамгаалах бүсээ хэрэглээгүй, түүнчлэн зорчигч хүүхдүүдэд зориулалтын хамгаалалтын суудал хэрэглэж заншаагүйгээс ослоос авсан гэмтэл нь амь насаа алдахад хүргэсэн байна. "Орон нутгийн зам-Хөдөлгөөний соёл" нэгдсэн арга хэмжээний хүрээнд Цагдаагийн газар, АЖДХолбоо, Төрийн банк, Татвар, Тээвэрлэгч ААНэгжүүд, “Санаа зөв” ТББ, Жолооны курсууд хамтран нэг цэгийн үйлчилгээг иргэдэд үзүүллээ. ИТХ, ГХУСАЗЗ аймгийн цагдаагийн газрын замын цагдаагийн тасагт хурд хэмжигч олголоо.
Аймгийн Замын цагдаагийн тасгийн хамт олон сургуулийн насны хүүхдүүдэд, мөн согтууруулах ундаа хэрэглэсэн үедээ машин жолоодсон алба хаагчдыг албан байгууллагад нь мэдэгдэж тухайн байгууллагад хөдөлгөөний аюулгүй байдал, ашиглалтын журмын эсрэг гэмт хэргийн талаар мэдээлэл хийж зам тээврийн ослоос урьдчилан сэргийлэх сургалт, зөвлөмжүүдийг шат дараатай зохион байгуулж байна.

Дүнгийн хурал хийлээ

  • .

  • 2019-06-12

  • 80

“Архив, албан хэрэг хөтлөлт, төрийн ажлын зохион байгуулалтын улсын үзлэг” Булган аймагт зохион байгуулагдаж өндөрлөлөө. Аймгийн ИТХ-ын ажлын алба, Засаг даргын Тамгын газар, Булган, Хутаг-Өндөр сум, Онцгой байдлын газар, Стандарт хэжилзүйн хэлтсийг сонгон Архив, албан хэрэг хөтлөлт, төрийн ажлын зохион байгуулалтын улсын үзлэгийг хийж өнөөдөр тус ажлын хэсэг дүнгийн хурлаа хийлээ. Байгаль орчин, аялал жуулчлалын яамны Төрийн нарийн бичгийн дарга Ц.Цэнгэлээр ахлуулсан Төрийн албаны зөвлөл, Үндэсний төв архивын удирдах ажилтнуудын бүрэлдэхүүнтэй манай аймагт ажиллласан.

Булган хангайн хийморьлог хөвгүүд хугацаат цэргийн албанд татагдаж тангаргаа өргөлөө

  • .

  • 2019-06-10

  • 60

Зоригт дайчин түүхтэй Булган хангайн хийморьлог хөвгүүд хугацаат цэргийн албанд татагдаж эх орон, ээж аав, элгэн түмнийхээ өмнө тангаргаа өргөлөө. Залуус маань цэргийн эрдэмд шамдан суралцаж, олон аавын хөвгүүдтэй мөр зэрэгцэн төрөлх нутгийнхаа нэрийг өндөрт өргөж, албаа үлгэр жишээ хаана гэдэгт итгэж байна.

Хуудас:  1   2   3   4   5   6   7  .... (нийт 418 мэдээ )

Булган 80-н жил